गत बर्ष रुकुमपश्चिमको मुसीकोट नगरपालिका १० चुन गाउँमा फलेको झण्डै तीन सय क्विन्टल लसुन कुहिएको थियो ।
यसको मुख्य कारण थियो– सडकको अभाव । यो बर्ष भने स्थानीय कृषि सडक बनेसँगै यहाँको लसुनले बजार पाएको छ ।
संयोग त अझ के भयो भने सडक निर्माणले पूर्णता पाएकै दिन ६० क्विन्टल लसुन बाहिरिएको छ ।
कर्णाली प्रदेश सरकार भूमी व्यवस्था तथा कृषि सहकारी मन्त्रालयको रु ४० लाख बजेटमा होल्तारा–भेरीखोला सडकको बैरामूलसम्म सडक निर्माण भएको छ ।
निर्माण समितिले कार्य सम्पन्न पश्चात् सार्वजनिक लेखापरीक्षण गरेकै दिन लसुनले पनि बजार पाएको वडा सदस्य धनबहादुर खड्काले जानकारी दिनुभयो । गाउँमै पर्सी किलो ८० रुपैयाँमा किसानले लसुन बिक्री गरेका छन् ।
यो सडक निर्माणमा बजेट विनियोजन गर्ने कृषिमन्त्री बिमला केसी, स्वकीय सचिव जयबहादुर पाण्डे र कृषि ज्ञान केन्द्रका कर्मचारीलाई पनि यो गाउँका बासिन्दाले धन्यवाद दिएका छन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
