जेठको उखरमाउलो गर्मीमा झरना देख्दा मन्त्री नै दंग (भिडियोसमेत)

प्रकाशित मिति :  २६ जेष्ठ २०७६, आईतवार


प्रदेशको अस्थायी मुकाम बुटवलबाट विहानै आएका प्रदेश पाँचका उद्योग, पर्यटन, वन तथा वातवारणमन्त्री लीला गिरी जेठ २५ गते शनिवार दाङमा दिनभरि व्यस्त देखिनुहुन्थ्यो ।

तुलसीपुरमा राप्ती शान्ति उद्यानमा बन्न थालेको बोटानिकल गार्डेन शिलान्यासपछि पुनः ३४ किलोमिटरको यात्रा पार गरी बबइ गाउँपालिकाको पुरन्धारा झरना पुग्दा मन्त्री थाकिसक्नुभएको थियो । तर, जब उहाँ झरनामा पुग्नुभयो, उहाँ अनुहारमा नसोचेकै परिवर्तन आयो ।

‘ओहो, जेठ महिनामा पनि यत्रो झरना ? चमत्कार नै रहेछ यहाँ त ।’ उहाँ साह्रै प्रभावित हुनुभयो ।

झरनाको अवलोकनपछि उहाँले झरना पर्यटकीय क्षेत्रको उद्घाटन गर्दै मन्त्री गिरीले पुरन्धारा झरनाबाट आफू निकै प्रभावित भएको जनाउँदै सुने र सोचेभन्दा राम्रो रहेकाले आगामी बर्षमा बजेटको अभाव नहुने बताउनुभयो ।

कृषि र वनलाई जोडेर आर्थिक समृद्धिको बाटो तय गरिएको उल्लेख गर्दै उहाँले त्यसको उत्कर्ष पर्यटन भएको बताउनुभयो । प्रदेश सरकारको ५० लाख र बबइ गाउँपालिकाको १२ लाख लगानीमा झरना क्षेत्रमा भौतिक संरचना निर्माण भइरहेका छन् ।

मन्त्रालयका सचिव धनञ्जय पौडेलले पुरन्धारा झरना क्षेत्रमा सरफाइ, इको ट्रेक, धार्मिक संरचना निर्माण, पानीको स्रोत संरक्षण, प्रकृति संरक्षण र पर्यटनमैत्री संस्कृति निर्माणमा जोड दिन आग्रह गर्नुभयो ।

गाउँपालिका अध्यक्ष भुवनेश्वर पौडेलको अध्यक्षतामा भएको कार्यक्रम सञ्चालन प्रमुख प्रकाशसकीय अधिकृत भीष्मकुमार मल्लले गर्नुभएको थियो भने उपाध्यक्ष सावित्रा विश्वकर्माले स्वागत गनुृभएको थियो । मन्त्री गिरी, सचिव पौडेल, डिभिजन वन कार्यालय दाङका प्रमुख दीपक ज्ञवालीलगायतले झरनाको अवलोकन गर्नुभएको थियो ।

टोलीले बबइमा प्रदेश सरकारको लगानीमा निर्माण भएका सभाहल र खेल मैदानको पनि निरीक्षण गरेको थियो ।

 

 

Facebook Comments